सिंहासन परिवर्तन गर्ने परमेश्वर

1. “उहाँले नै समय र ऋतुहरू परिवर्तन गर्नुहुन्छ। उहाँले राजाहरूलाई सिंहासनमा राख्नुहुन्छ र उनीहरूलाई अपदस्थ गर्नुहुन्छ। उहाँले समझदारहरूलाई बुद्धि दिनुहुन्छ अनि विवेकीहरूलाई ज्ञान दिनुहुन्छ।” [दानियल २:२१]

2. “परमप्रभुले दरिद्रता र धन-सम्पत्ति पठाउनुहुन्छ। उहाँले नम्र तुल्याउनुहुन्छ, र उहाँले उच्च पार्नुहुन्छ। 

राजकुमारहरूसित बसाल्नलाई तथा सम्मानको आसनको उत्तराधिकारी बनाउनलाई उहाँले दुर्बललाई धूलोबाट र दरिद्रलाई घुरानबाट उठाउनुहुन्छ। किनभने पृथ्वीका जगहरू परमप्रभुकै हुन्, उहाँले संसारलाई तीमाथि बसाल्नुभएको हो।” [१ शमूएल २:७-८]

3. “उहाँले सोधपूछविना नै शक्तिशालीहरूलाई नाश गर्नुहुन्छ, र तिनीहरूका सट्टामा अरूहरूलाई बसाल्नुहुन्छ। 

किनकि तिनीहरूले गरेका सबै काम उहाँ जान्नुहुन्छ, उहाँले तिनीहरूलाई राती पल्टाइदिनुहुन्छ, र तिनीहरू धूलोपीठो हुन्छन। 

तिनीहरूका अपराधहरूका कारण उहाँले तिनीहरूलाई दण्ड दिनुहुन्छ, जहाँ सबैले तिनीहरूलाई देख्न सक्छन। 

किनभने तिनीहरूले उहाँको आज्ञा पालन गर्न छोड़े, र उहाँका मार्गहरूको वास्ता गरेनन। 

गरीबहरूको रोदन उहाँको कानमा पुग्ने तिनीहरूले तुल्याए, यसरी आवश्यकतामा भएकाहरूको दुहाई उहाँले सुन्नुभयो। 

तर यदि उहाँ चूप लाग्नुभयो भने कसले उहाँलाई दोष दिन सक्छ? यदि उहाँले आफ्नो अनुहार लुकाउनुभयो भने कसले उहाँलाई देख्न सक्छ? तापनि उहाँ मानिस र राष्ट्र दुवैमाथि हुनुहुन्छ, 

ईश्वरहीन मानिसलाई शासक बन्नबाट र मानिस जातिको लागि पासो थाप्नबाट रोक्नलाई।” [अय्यूब ३४:२४-३०]

4. “तिमीहरू स्वर्गको विरुद्धमा आफ्नो हाँक नदेखाओ, अनि मुन्टो बटारेर वचन नबोल।

पूर्वदेखि होस वा पश्चिमदेखि, अथवा मरुभूमिबाट होस, कसैले पनि मानिसलाई उचाल्न सक्दैन। 

तर परमेश्वरले नै न्याय गर्नुहुन्छ, उहाँले एउटालाई होच्याउनुहुन्छ, र अर्कालाई उच्च पार्नुहुन्छ।” [भजनसंग्रह ७५:५-७]

5. “घरीघरी हप्की पाएर पनि कोही हठी नै भइरहन्छ भने, त्यो एक्कासि नाश हुनेछ, तरकीबै नरहने गरी। 

धर्मी सप्रेमा मानिसहरू रमाउँछन, दुष्टले शासन गर्दा मानिसहरू वेदनाले छटपटाउँछन। 

न्याय कायम गरेर राजाले देशलाई स्थायित्व दिन्छ, तर घूसको लोभ गर्नेले मुलुकलाई सर्वनाश गर्छ।” [हितोपदेश २९:१,२,४]

6. “उहाँले आफ्नो बाहुलीको सामर्थ्य प्रकट गर्नुभएको छ। उहाँले मनभित्रको कल्पनामा घमण्ड गर्नेहरूलाई छरपष्ट पार्नुभएको छ। 

उहाँले शक्तिशालीहरूलाई तिनीहरूका सिंहासनबाट हटाउनुभएको छ, र दीनहरूलाई उचाल्नुभएको छ।” [लूका १:५१-५२]