केही व्यक्तिहरूले नारीकाे कारणले याे संसारमा पाप आयो भनेर नारीलाई दाेष दिने गर्छन । तर सत्य याे पनि हाे कि त्यही नारीद्वारा नै सारा संसारको उद्दारकर्ता पनि आउनुभयाे, त्यही नारीलाई सर्वप्रथम प्रभु येशू ख्रीष्टले आफ्नो पुनरुत्थानको खबर दिनुभयो र महान सुसमाचार सुनाउने जिम्मेवारी पनि सुम्पनु भएको थियोे ।
हाम्रो समाजमा नारीलाई एक कमजोर पात्रको रूपमा हेरिन्छ । बाइबल अनुसार पहिलो नारीलाई नरकाे करङकाे हड्डीबाट बनाईएकाे थियोे । हड्डीकाे बनावटलाई हेर्ने हाे भने याे सिमेन्टभन्दा बलियो हुन्छ । अर्थात परमेश्वरले नारीलाई एक कमजोर पात्रको रूपमा सृष्टि गर्नुभएको छैन, तर पुरूषभन्दा बलियो बनाउनु भएको छ । कतिपय पुरूषले गर्न नसक्ने र सहन नसक्ने कुरा नारीले गर्न र सहन सक्छन ।
यस पुस्तकमा हामीले यस्तै ९० जना नारीका प्रेरणादायी जीवनी अध्ययन गर्न पाउनेछाैँ, जसले विपरीत परिस्थितिमा पनि मण्डली, समाज, राष्ट्रलाई मात्रै नभएर सम्पुर्ण बिश्वलाई परिवर्तन गर्न महत्त्वपूर्ण याेगदान दिए । शताब्दीऔंदेखि परमेश्वरले आफ्नो राज्यलाई अगाडि बढाउन नारीहरूलाई बोलाई प्रयोग गर्न जारी राख्नुभयो । सुधारक र लेखिकादेखि आमा, शिक्षिका, नर्स, प्रचारिका र वैज्ञानिकहरूसम्म नारीहरूले प्रत्येक पुस्तामा ख्रीष्टको साक्षी दिएका छन । उनीहरूको योगदान हरेक महादेश र विभिन्न संस्कृतिमा फैलिएको छ जसले परमेश्वरको उद्देश्य कहिल्यै लिङ्ग, वर्ग वा भूगोलमा सीमित छैन भन्ने प्रमाण दिन्छ ।
निष्कर्षमा, परमेश्वरले मण्डली, समाज, राष्ट्र र बिश्वकाे इतिहास परिवर्तन गर्न केबल पुरूषलाई मात्रै हाेईन, तर स्त्रीहरूलाई पनि आफ्नो सेवामा प्रयोग गर्नुभएको छ भन्ने तथ्य यस पुस्तकले दिनेछ । काेराेना महामारीकाे लकडाउनदेखि लेख्न शुरू गरिएको पुस्तकहरू मध्ये याे हाम्रो समुहको छैठौं पुस्तक पनि हाे ।
* याे पुस्तक प्रार्थना, विश्वास र दृढताका साथ परमेश्वर र आफ्नो राष्ट्रको सेवा गर्ने नेपालका नारीहरूलाई समर्पण गरिएको छ ।
यसकारण लेखिएको छ,
“यसैकारण परमेश्वरले मानिसलाई आफ्नै स्वरूपमा सृष्टि गर्नुभयो । परमेश्वरकै प्रतिरूपमा उहाँले तिनलाई सृष्टि गर्नुभयो । नर र नारी नै गरी उहाँले तिनीहरूलाई सृष्टि गर्नुभयो ।” [उत्पत्ति १:२७]
“अब न यहुदी छ न ग्रिक, न दास न फुक्का, न पुरुष न स्त्री छ किनभने ख्रीष्ट येशूमा तिमीहरू सबै एउटै हौ ।” [गलाती ३:२८]
पुस्तकबारे सम्पादकको हृदयबाट :
धर्मशास्त्रको पहिलो पृष्ठबाट नै नारीहरूको कथाबिना मानवजातिको कथा भन्न सकिँदैन । यो पुस्तक परमेश्वरका छोरीहरूको जीवनयात्रा हो जुन अदनको बगैंचामा हब्बाबाट सुरु भएर वर्तमान समयकी प्रसिद्ध खगोल भौतिकशास्त्री जेनिफर वाइजम्यानसम्म जारी छ । इतिहासको लामो यात्रामा तिनीहरूको आवाज, छनोट र बलिदानले परिवार, समुदाय, राष्ट्र र विश्वासको मार्गलाई औधी प्रभाव पारेको छ । यो पुस्तक केवल जीवनी सङ्ग्रह होइन तर पितृसत्तात्मक समाजको घेराभित्र रहेका नारीहरूलाई परमेश्वरले आफ्नो अभियानको केन्द्रमा कसरी ल्याउनुभएको छ भन्ने कुराको गबाही पनि हो ।
बाइबल आफैँले यस वास्तविकताको उल्लेखनीय साक्षी दिन्छ । सार्वजनिक क्षेत्रमा पुरुषहरूले प्रभुत्व जमाएको संसारमा परमेश्वरले नारीहरूलाई उठाउनुभयो जो उहाँको उद्देश्यका माध्यम बने । अगमवक्ता दबोराले इस्राएललाई विजयतर्फ डोऱ्याइन्, मोआबी एकल महिला रुथको नाम ख्रीष्टको वंशावलीमा पर्न सफल भएको छ जसले विश्वास रगतको नाताभन्दा ठुलो छ भनेर देखाउँछ । एस्तरले राजाका अगाडि आफ्नो ज्यान जोखिममा राख्दै घोषणा गरिन्, “यदि मेरो नाश हुन्छ भने पनि नाश होस्” (एस्तर ४:१६) र उनको साहसले आफ्नो जातिलाई बचाइयो । नासरतकी मरियमले विनम्रतासाथ परमेश्वरको आह्वानप्रति प्रतिक्रिया जनाइन्, “म परमप्रभुकी दासी हुँ, मलाई तपाईंको वचनअनुसार होस्” (लुका १:३८) । मृत्युमाथि विजय हासिल हुनुभएका ख्रीष्टले आफ्नो पुनरुत्थानको खबर पहिले नारीलाई नै सुम्पनुभयो र उनी सुसमाचारका प्रारम्भिक सन्देशवाहक बनिन् । यी कथाले हामीलाई स्मरण दिलाउँछन् कि परमेश्वरको उद्देश्य मानवीय प्रणाली वा सांस्कृतिक अपेक्षाद्वारा बाँधिएको छैन । उहाँका आत्मा जहाँ चाहनुहुन्छ त्यतै गतिशील हुनुहुन्छ अनि उहाँले छोरा र छोरी दुबैलाई सशक्त बनाउनुहुन्छ ।
बाइबलले पूर्णता पाएसँगै कथा टुङ्गिएन । शताब्दीऔंदेखि परमेश्वरले आफ्नो राज्यलाई अगाडि बढाउन नारीहरूलाई बोलाई प्रयोग गर्न जारी राख्नुभयो । सुधारक र लेखिकादेखि आमा, शिक्षिका, नर्स, प्रचारिका र वैज्ञानिकहरूसम्म नारीहरूले प्रत्येक पुस्तामा ख्रीष्टको साक्षी दिएका छन् । उनीहरूको योगदान हरेक महादेश र विभिन्न संस्कृतिमा फैलिएको छ जसले परमेश्वरको उद्देश्य कहिल्यै लिङ्ग, वर्ग वा भूगोलमा सीमित छैन भन्ने प्रमाण दिन्छ ।
हाम्रो आफ्नै नेपाली सन्दर्भमा यस सत्यताले गहिरो अर्थ राख्छ । शताब्दीऔंदेखि नेपाली समाजले प्रायः नारीहरूलाई मौन वा किनारमा राखेको छ । तैपनि यस भूमिमा सुसमाचारले जरा गाडिसकेको छ, नारीहरू शक्तिशाली आवाज र ख्रीष्टका लागि विश्वासयोग्य कामदार बनेका छन् । तिनीहरूले मन्डलीमा मात्र होइन तर शिक्षा, स्वास्थ्य, सामाजिक रूपान्तरण र एक पटक अकल्पनीय ठानिएको क्षेत्रमा पनि सेवा गर्छन् । उनीहरूको साहसले नेतृत्व केवल पुरुषहरूको हो भन्ने धारणालाई चुनौती दिएको र उनीहरूको विश्वासले पुष्टि गर्छ कि फसलको खेत प्रभुको हो जसले आफ्नो इच्छानुसार आफ्ना मजदुरहरू छान्नुहुन्छ । यस पुस्तकमा वर्णन गरिएका जीवनीले नेपाली नारीहरूलाई यस महान् कथाको हिस्साको रूपमा आफूलाई हेर्न निमन्त्रणाको रूपमा काम गर्दछ । परमेश्वरको राज्यमा नारीहरू दर्शक होइनन् तर उहाँको मिसनमा सहभागी र अगुवा हुन् ।
यो पुस्तक आफैँमा उक्त विविधता र समृद्धिको प्रतिविम्ब हो । यो नेपालका विभिन्न कुनाका १८ जना लेखकद्वारा लिखित रचना हो जसले सबै ७ ओटै प्रदेशको प्रतिनिधित्व गर्दछन् । लेखकहरू हामीलाई याद दिलाउँछन् कि बाइबलीय, ऐतिहासिक र समकालीन नारीहरूको कथा सम्झनका लागि मात्र होइन तर हाम्रो आफ्नै समयमा नयाँ दृष्टिकोणसहित बाँच्नका लागि पनि हो ।
यी पृष्ठ पल्टाउँदै गर्दा उत्पत्तिदेखि अहिलेसम्म परमेश्वरले आफ्ना छोरीहरूमार्फत कसरी काम गर्नुभएको छ भनेर देख्न तपाईंलाई प्रोत्साहान मिलोस् । साहस, भक्ति र दृढताका उदाहरणहरूले आजका नारीहरूलाई परमेश्वरको मिसनमा लागी आफ्नो स्थान ग्रहण गर्न प्रेरित गरुन् । चाहे घरको शान्त सेवामा होस् वा मन्डलीको गतिशील साक्षीमा होस् वा समाजको चुनौतीपूर्ण मागहरूमा होस् तपाईं परमेश्वरको योग्य अगुवा बन्न सक्नुहुन्छ । एक पटक फेरि प्रेरित पावलको वचन हाम्रो हृदयमा गुन्जियोस्, “अब न यहुदी छ न ग्रिक, न दास न फुक्का, न पुरुष न स्त्री छ किनभने ख्रीष्ट येशूमा तिमीहरू सबै एउटै हौ” (गलाती ३:२८)।
पुस्तक विमोचन मिति : २०८२ मङ्सिर १०
स्थान : चितवन, भरतपुर, दास ढुङ्गा
