उत्तम उपहार

 

जेरोम आफ्नो कार्यकक्षमा बसेर बाईबल अनुवादको काम गरिरहेका थिए। उनले नै सबैभन्दा पहिला बाईबललाई लेटिन भाषामा अनुवाद गरेका थिए। एकदिन अचानक प्रभु येशू एउटा सानो बालकको रूपमा तिनको अगि देखा पर्नुभयो। 

प्रभु येशूलाई यसरी सानो बालकको रूपमा आफ्नो अगि पाउँदा जेरोम खुशीले अति नै बिभोर भए। उनीसित खुशीको कुनै सिमालनै रहेन। उनी खुशीले अतिनै उन्मत्त भई खडा भए र प्रभु येशूलाई स्वागत गरे। त्यसपछि उनले प्रभु येशूलाई भने, 

“प्रभु, हजुरलाई हार्दिक स्वागत छ! हजुर मकहाँ यसरी आउनु भएकोमा म अति हर्षित छु। प्रभु! भन्नुहोस, म हजुरलाई के उपहार दिऊँ? म मेरो हृदयभरिको उपहार दिन चाहन्छु। म मेरो जीवनको सबैभन्दा उत्तम उपहार हजुरलाई दिन चाहन्छु। हजुरलाई मैले के उपहार दिँदा हजुर खुशी हुनसक्नु हुन्छ?”

प्रभु येशूले जेरोमलाई भन्नुभयो, “तिमीले मलाई के चाहिँ उपहार दिन सक्छौ र? जब कि स्वर्ग र पृथ्वी मेरै हो। संसारमा भएका सबै थोक मेरै हुन। लौ अब भन तिमी मलाई के दिन सक्छौ?”

तब जेरोमले प्रभु येशूलाई भने, “प्रभु, म हजुरलाई धेरै प्रेम गर्छु। यसकारण म हजुरलाई केही न केही उपहार दिन चाहन्छु। मैले मेरो जीवनभरि परिश्रम गरेर केही पैसा कमाएर बचाएर राखेको छु। यदि मैले त्यो पैसा हजुरलाई दिएँ भने हजुरले ग्रहण गर्नुहुन्छ?”

प्रभु येशूले मुस्कुराउँदै जेरोमलाई भन्नुभयो, “त्यो पैसा बरू खान नपाएका गरीबहरूलाई देऊ।”

जेरोमले फेरि प्रभु येशूलाई बिन्ति गरे, “प्रभु, आज हजुर मेरो कार्यकक्षमा आउनुभएको छ। यसकारण म हजुरलाई कुनै पनि हालतमा रित्तो हात फर्काउन सक्तिनँ। हजुरले मबाट केही न केही लिएरै जानुपर्छ। हजुर यहाँबाट खाली हात जान पाउनुहुन्न।”

प्रभु येशूले जेरोमलाई भन्नुभयो, “यदि तिमी मलाई केही न केही उपहार दिने इच्छा गछौँ भने मलाई अरू केही चाहिँदैन, तर केवल तिमीसित भएका सबै पापहरू, अधर्महरू र तिमीभित्रका लोभहरू मलाई देऊ। म ती सब पाप, अधर्म र लोभहरू आफूमाथि लिएर तिम्रो निम्ति क्रूसमा टाँग्न चाहन्छु। यी कुराहरूले मात्र मेरो हृदय आनन्दले भरिनेछ र म तिमीसित खुशी हुनेछु।”

प्रियः मित्रहरू, साँच्चै नै प्रभु येशूलाई हाम्रो कुनै थोकको पनि आवश्यकता छैन। उहाँलाई हाम्रा पाप, अधर्म र लोभहरू भए पुग्छ।

* तपाईंको याे नयाँ साल प्रभु येशूलाई अति नै प्रसन्न पार्नेवाला जीवन बन्न सकाेस!

यसकारण लेखिएको छ,

“निश्चय नै उसले हाम्रा निर्बलताहरू बोक्यो, र हाम्रा दु:ख भोग्यो, तापनि हामीले उसलाई परमेश्वरबाट हिर्काइएको, उहाँबाट पिटिएको र दु:खमा परेको सम्झ्यौं। 

तर ऊ त हाम्रा अपराधहरूका निम्ति छेड़ियो। हाम्रा अधर्मका निम्ति ऊ पेलियो। हामीमा शान्ति ल्याउने दण्ड उसमाथि पर्यो, र उसको कोर्राको चोटले हामी निको भयौं।” [यशैया ५३४-५]

“तर उहाँ ज्योतिमा हुनुभएझैँ यदि हामी पनि ज्योतिमा हिँड्छौं भने, एक-अर्कासित हाम्रो सङ्गति हुन्छ, र उहाँका पुत्र येशूको रगतले हामीलाई सबै पापबाट शुद्ध पार्छ। 

यदि हामीमा पाप छैन भनी हामी भन्छौं भनेता हामीले आफैलाई धोका दिन्छौं, र हामीमा सत्य हुँदैन। 

यदि हामीले आफ्ना पापहरू स्वीकार गर्यौं भने उहाँले हाम्रा पाप क्षमा गर्नुहुन्छ, र सबै अधर्मबाट हामीलाई शुद्ध पार्नुहुन्छ, किनकि उहाँ विश्वासयोग्य र धर्मी हुनुहुन्छ। 

यदि हामीले पाप गरेका छैनौं भनी हामी भन्छौं भने हामी उहाँलाई झूटा तुल्याउँछौं, र उहाँको वचन हामीमा हुँदैन।” [१ यूहन्ना १:७-१०]

Sources :

पुस्तक : दर्पण छायाँ (लघुकथा र दृष्टान्तहरूकाे सङ्गालाे), संकलन : तिमाेथी राई, प्रकाशन काल : मार्च २०१५, पृष्ठ नं. ३१-३२