गरूडकाे शिकार गर्ने तरिका

 

गरूडको बच्चाले भर्खरै उड्न सिकेको थियो। जोशले भरिएको, सबैलाई आफ्नो कलाबाजी देखाउन व्यस्त थियो।

त्यसपछि उसले रुखमुनि एउटा बँदेल दौडिरहेको देख्यो, “आमा, त्यो बँदेललाई हेर्नुहाेस, कति मिठो होला, म अहिले शिकार गर्छु।”

“होइन छोरा!” आमाले भनिन, “तिमी अझै यसका लागि तयार छैनौ, बँदेल एक ठूलो शिकार हो, तिमीले मुसाबाट सुरु गर।”

बच्चा गरूड आज्ञाकारी थियो। तुरुन्तै आमाको आज्ञा मान्‍यो र चाँडै ठूलो कौशलताका साथ मुसाको शिकार गर्न सिक्याे।

अब उसको आत्मविश्वास धेरै बढेको थियो। ऊ आफ्नी आमाकहाँ गयो र उनलाई फेरि बँदेलको शिकार गर्न भन्यो।

“अहिले होइन छोरा, पहिले खरायो सिकार गर्न सिक” तिनकी आमाले भनिन।

केही दिनमा त्यो बच्चा गरूडले पनि खरायोको शिकार गर्न सिक्याे। अब उसले आफ्नो पहिलो निशाना बँदेललाई पक्कै मार्न सक्छ भन्ने कुरामा ऊ ढुक्क थियाे र यसका लागि ऊ अनुमति लिन आमाकहाँ पुग्याे।

तर यसपटक पनि आमाले अस्वीकार गरिन र भनिन, “पहिले भेडाको शिकार गर।” त्याे बच्चा गरूड भेडाको शिकार गर्न पनि चाँडै माहिर भयो।

त्यसपछि एक दिन ऊ आफ्नी आमासँग हाँगामा बसिरहेको थियो। जब एउटा बँदेल त्यहाँबाट गयो, तब बच्चा गरूडले आफ्नो आमालाई हेर्यो। आमा मुस्कुराए र बँदेललाई मार्न इशारा गरिन।

बच्चा गरूड तुरुन्तै तल उड्यो र त्यो दिन पहिलो पटक आफ्नो मनपर्ने खाना खायो।

साथीहरू, कल्पना गर्नुहोस, आमाले पहिले नै बँदेलको शिकार गर्न भन्नुभएको भए के हुन्थ्यो हाेला ?

सानो गरूड पक्कै असफल हुने थियो र सम्भवतः उसले आफ्नो आत्मविश्वास सधैंको निम्ति गुमाउने थियो। तर जब उनले पहिले सानाे शिकार गर्याे, तब उसको आत्मविश्वास र क्षमता दुवै बढ्यो। अन्ततः उसले आफ्नो इच्छित लक्ष्य हासिल गर्न सफल भयो।

नैतिक पाठ:

गरूडको यो घटनाले हामीलाई हाम्रो ठूलो लक्ष्यलाई स-साना सजिलो भागमा विभाजन गरेर प्राप्त गर्न सिकाउँछ। आफ्नाे लक्ष्यलाई प्राप्त गर्नको लागि आफूभित्र धैर्य राख्नुहोस, आफ्नो गुरुको आज्ञापालन गर्नुहोस र योजनाबद्ध तरिकाले यसलाई सानो भागमा बाँड्नुहोस र अन्तमा आफ्नो त्यो ठूलो लक्ष्य हासिल गर्नुहोस।