येशू ख्रीष्टको बारेमा रोचक तथ्यहरू

१. येशू कन्याबाट जन्मनुभएको थियो । 

 मरियम र योसेफको अझै पूर्ण विवाह भएको थिएन । मरियम अझै पनि कुमारी थिइन् र गर्भवती हुँदा र येशूलाई जन्म दिँदा यूसुफसँग विवाह गर्ने प्रतिज्ञा गरिएको थियो । येशूको गर्भधारणसँग यूसुफको कुनै सम्बन्ध थिएन । बरु, पवित्र आत्माले चमत्कारपूर्ण रूपमा मरियमको गर्भमा बच्चा प्रदान गर्नुभयो । [मत्ती १:१८-२३, लूका १:३४-३५] त्यो तथ्यलाई ध्यानमा राख्दै, येशूलाई परमेश्वरको पुत्र भनेर चिनिन्छ । येशूको गर्भधारण चमत्कारिक थियो र यो चमत्कारलाई यशैयाको भविष्यवाणीको पूर्ति पनि थियो । [यशैया ७:१४]

गर्भवती हुनु र कुमारी रहनु अब मिथक रहेन भन्ने कुरा मनन गर्नु वाञ्छनीय छ । चिकित्सा क्षेत्रमा भएको प्रगतिको कारण, एक व्यक्तिलाई कृत्रिम रूपमा गर्भाधान गर्न सकिन्छ, गर्भवती हुन सक्छ र कुमारी रहन सक्छ । यसबाहेक, प्रकृतिमा पार्थेनोजेनेसिस भनिने एउटा घटना छ, जुन निषेचन बिना प्रजनन हो ।

२. मरियमले येशूको नाम रोजिनन् । 

 येशूले आफ्नो नाम स्वर्गदूतबाट पाउनुभयो । [लूका १:२८-३१] याेसेफ र मरियमले नाम रोजेनन्, तर प्रभुका स्वर्गदूत, गब्रिएलले उनीहरूलाई बच्चाको नाम कसरी राख्ने भनेर बताए ।

 

३. येशू नामको अर्थ “परमेश्वरले बचाउनुहुन्छ” हो ।

 इस्टनको बाइबल शब्दकोश अनुसार, येशू हिब्रू नाम जोशुआको ग्रीक अनुवाद हो, जसको अर्थ मुक्ति हो । धेरै ख्रीष्टियनहरू विश्वास गर्छन् कि परमेश्वरले यो नाम पृथ्वीमा येशूको उद्देश्यलाई संकेत गर्न रोज्नुभएको थियो । त्यसैले, मत्ती १:२१ मा गब्रिएलले भने, “...तिनले एउटा पुत्र जन्माउनेछिन्, र तिमीले उहाँको नाउँ येशू राख्नेछौ, किनभने उहाँले आफ्ना मानिसहरूलाई तिनीहरूका पापबाट बचाउनुहुनेछ ।”

४. येशूको थर ख्रीष्ट थिएन ।

 २१ औं शताब्दीमा अहिले हामीसँग जस्तो येशूको थर थिएन । हामी “येशू ख्रीष्ट” भन्ने शब्द यति धेरै सुन्छौं कि ख्रीष्ट येशूको थर हो भनेर सोच्न सजिलो हुन्छ । तर यो सत्य होइन । प्रथम शताब्दीको प्यालेस्टाइनमा, मानिसहरूको थर थिएन । मानिसहरूले आफ्ना आमाबाबुलाई उल्लेख गरेर अरूलाई चिनाउने गर्थे । [यूहन्ना ६:४२] ख्रीष्ट उहाँको अन्तिम नाम होइन, तर एउटा उपाधि हो । ख्रीष्ट शब्द ग्रीक शब्द क्रिस्टोसबाट आएको हो, जसको अर्थ “अभिषिक्त व्यक्ति” हो ।

५. येशूकाे जन्म राजा दाऊद जन्मेको गाउँमा नै भएको थियो ।

६. येशूको जन्म एउटा नम्र ठाउँमा भएको थियो । परमेश्वरका पुत्र येशू दरबारमा जन्मनुभएन, उहाँको जन्म गोठमा भएको थियो र उहाँलाई जनावरहरूको लागि चराउने डुँडमा राखिएको थियो । [लूका २:७] यो विनम्र सुरुवातले हामीलाई देखाउँछ कि परमेश्वरले दीन र गरिबलाई वास्ता गर्नुहुन्छ । साथै, येशू गरिब घरानामा जन्मनु भयाे । सिकर्मी परिवारमा जन्मेका येशू गरिब, दिन मजदुर घरबाट आउनुभएको थियो । यसको अर्थ येशूलाई गरिबीमा बाँच्नु, भोक र अभाव कस्तो हुन्छ भन्ने कुरा थाहा थियो । येशू परमेश्वरको पुत्र भए पनि, उहाँले तपाईं र म जस्तै एक साधारण मानिसको रूपमा पृथ्वीमा आउने निर्णय गर्नुभयो ।

७. येशू सिकर्मीको रूपमा हुर्कनुभयो ।

 यूसुफलाई सिकर्मीको रूपमा चिनिन्थ्यो [मत्ती १३:५५ ], र येशूले यो काम सिकेको हुनुपर्छ किनभने उहाँको गृहनगरको भीडले उहाँलाई सिकर्मीको रूपमा पनि चिनाउँछ । [मर्कूस ६:३] ग्रीक शब्द टेकटोनको अर्थ कारीगर वा शिल्पकार हो । येशूले १२ देखि ३० वर्षको उमेरसम्म सिकर्मीको रूपमा काम गर्नुभयो ।

८. येशूको जन्म सम्भवतः वसन्त वा गर्मीमा भएको हुन सक्छ ।

 लाखौं मानिसहरूले डिसेम्बर २५ मा येशूको जन्मोत्सव मनाउने भए तापनि बाइबलमा येशूको जन्म कहिले भएको थियो भन्ने कुनै मिति उल्लेख गरिएको छैन । यो अचम्मलाग्दो हुन सक्छ, तर बाइबलले हामीलाई येशूको जन्म मिति बताउँदैन । यद्यपि धेरैले यो मान्छन् किनभने रोमन सम्राट कन्स्टेन्टाइन, जो रोमन साम्राज्यमा ईसाई धर्मका एक विशाल समर्थक थिए, एकै समयमा हुने मूर्तिपूजक बिदाहरूबाट ध्यान हटाउन वर्षको त्यो समय छनौट गरेका थिए । डिसेम्बर किन रोजे भन्ने सम्भावित अर्को व्याख्या यो हो कि त्यो दिन यहूदीहरूको उज्यालोको चाडको मिति थियो, जसलाई हनुक्काहको चाड भनिन्छ, जाे २५ देखि ३० किसलेभमा पर्थ्यो । 

९. धेरैजसो विद्वानहरूले येशूको जन्म मिति ईसापूर्व ६ र ईसापूर्व ४ को बीचमा राखेका छन् ।

 येशू वास्तवमा १ ईस्वीमा जन्मनुभएको थिएन । विद्वानहरूले उहाँको सेवकाई सुरु भएको वर्ष, जुन ईस्वी २७-२९ थियो, देखि उल्टो गणना गरेर अनुमान लगाए । त्यतिबेला येशू लगभग ३० वर्षको हुनुहुन्थ्यो । त्यसकारण, उनको जन्म वर्ष ६ देखि ४ ईसापूर्वको बीचमा भएको हुनुपर्छ ।

१०. येशूले पापरहित जीवन बिताउनुभयो ।

 येशूको मृत्युको बारेमा हाम्रो कुरामा प्रवेश गर्नु अघि यो तथ्य स्थापित गर्नु महत्त्वपूर्ण छ । यदि येशूले कुनै पाप गर्नुभएको भए, उहाँको मृत्यु पूर्ण रूपमा बेकार हुने थियो । उहाँ पापरहित हुनुभएकोले, उहाँको मृत्यु अनन्त रूपमा मूल्यवान छ । [हिब्रू ४:१४-१६, २ कोरिन्थी ५:२१] येशूले कहिल्यै पाप गर्नुभएन । येशू पूर्ण मानव हुनुहुन्थ्यो, तर उहाँले कहिल्यै पाप गर्नुभएन । उहाँले सिद्ध जीवन बिताउनुभयो । यसैकारण येशू हाम्रा पापहरूको लागि सिद्ध बलिदान हुन सक्षम हुनुभयो ।

११. येशू पापको लागि मर्नुभयो ।

 सम्पूर्ण बाइबलको केन्द्रीय घटना येशू ख्रीष्टको मृत्यु हो । हाम्रो बलिदानको थुमा येशू हाम्रा पापहरूको लागि मर्नुभयो । [१ कोरिन्थी १५:३, रोमी ६:२३, रोमी ५:८] उहाँ हाम्रा पापहरूका लागि मर्नुभयो । हाम्रा पापहरूको दण्ड भोग्न येशू क्रूसमा मर्नुभयो । यो संसारलाई बचाउने परमेश्वरको योजना थियो । [यूहन्ना ३:१६] उहाँको मृत्यु अन्त्य थिएन, तर यो विश्वास गर्ने सबैको लागि नयाँ जीवनको सुरुवात थियो ।

१२. बेथलेहेमको अर्थ “रोटीको घर” हो ।

 येशू जन्मनुभएको शहरको नाम बेथलेहेम हो । हिब्रूमा, यो दुई शब्दहरू हुन् । बेथको अर्थ “घर” र लेहेमको अर्थ “रोटी” हो । यहाँ यसको महत्त्व बुझ्न गाह्रो छ । अगमवक्ता मीकाले मसीह बेथलेहेममा जन्मनेछन् भनेर भविष्यवाणी मात्र गरेनन्, तर येशूले बारम्बार आफूलाई “जीवनको रोटी” भनेर पनि सम्बोधन गर्नुभयो । [मीका ५:२, यूहन्ना ६:३५,४८,५१]

१३. येशूका चार दाजुभाइ र दिदीबहिनी पनि थिए ।

 धेरैजसो मानिसहरू उहाँ एक मात्र सन्तान हुनुहुन्थ्यो भन्ने सोच्छन । मत्तीको सुसमाचारको अध्याय १३ पद ५५ र ५६ मा, याकूब, योसेफ, यहूदा र सिमोनलाई येशूका भाइहरूको रूपमा नामाकरण गरिएको छ । उहाँका दिदीबहिनीहरू पनि थिए भनेर पनि उल्लेख गरिएको छ, तर तिनीहरूको नाम उल्लेख गरिएको छैन र तिनीहरूको संख्या उल्लेख गरिएको छैन । ख्रीष्टियन विश्वास अनुसार, तिनीहरू वास्तवमा सौतेनी दाजुभाइ र सौतेनी दिदीबहिनीहरू थिए किनभने यूसुफ येशूका जैविक पिता होइनन् ।

१४. येशू एक अविवाहित पुरुष हुनुहुन्थ्यो जसले कहिल्यै कुनै सन्तान जन्माउनुभएन।

 ख्रीष्टियन विश्वास अनुसार, येशू आफ्नो जीवनभर अविवाहित पुरुष रहनुभयो र उहाँको कुनै सन्तान भएन, किनकि बाइबल उहाँको प्रेम र व्यक्तिगत जीवनको बारेमा पूर्ण रूपमा मौन छ । येशूको परिवारको उल्लेख गर्ने प्रत्येक बाइबल पदले उहाँकी आमा र भाइबहिनीहरूलाई जनाउँछ, तर न त पत्नीलाई न त छोराछोरीलाई ।

 

१५. येशूले रेकर्ड गर्नुभएको प्रत्येक प्रार्थनामा, उहाँले परमेश्वरलाई “पिता” भनेर सम्बोधन गर्नुभयो ।

१६. येशूले शैतानको विरुद्धमा प्रयोग गर्नुभएको प्रत्येक उद्धरण व्यवस्थाको पुस्तकबाट थियो ।

कल्पना गर्नुहोस्, यदि तपाईंको सम्पूर्ण आत्मिक जीवन तपाईंले व्यवस्थाको पुस्तक कति राम्ररी जान्नुहुन्छ भन्ने कुरामा निर्भर थियो भने ! जब शैतानले येशूलाई मरुभूमिमा परीक्षामा पार्छ, उहाँले पञ्चग्रन्थको यो एउटा पुस्तकको अंशको साथ हरेक परीक्षाको जवाफ दिनुहुन्छ ।

येशूले ४० दिनसम्म उपवास बस्नुभएको थियो र भोकले ग्रस्त हुनुभएको थियो । जब शैतानले उहाँलाई ढुङ्गालाई रोटी बनाउन आफ्नो शक्ति प्रयोग गर्न लोभ्याउँछ, येशूले व्यवस्था ८:३ बाट उद्धृत गर्दै जवाफ दिनुहुन्छ: “लेखिएको छ: 'मानिस रोटीले मात्र बाँच्दैन, तर परमेश्वरको मुखबाट निस्केको हरेक वचनले बाँच्नेछ'।” [मत्ती ४:४]

त्यसपछि, शैतानले येशूलाई मन्दिरबाट हामफालेर आफ्नो विशिष्टता प्रमाणित गर्न परीक्षामा पार्छ । शैतानले येशूलाई सम्झाउँछ कि परमेश्वरले उहाँलाई लड्न दिनुहुनेछैन । यस पटक, येशूले व्यवस्था ६:१६ बाट एउटा उद्धरण निकाल्नुहुन्छ: “यो पनि लेखिएको छ: 'तैंले परमप्रभु आफ्ना परमेश्वरको परीक्षा नगर'।” [मत्ती ४:७]

अन्तमा, यदि येशूले उसलाई दण्डवत् गर्नुभयो भने शैतानले येशूलाई संसार र यसका सबै वैभवहरू प्रदान गर्दछ । अनि येशूले व्यवस्था ६:१३ बाट उसलाई जवाफ दिनुहुन्छ, “शैतान, तँ दूर होइजा ! किनभने लेखिएको छ, 'तैंले परमप्रभु आफ्ना परमेश्वरलाई दण्डवत् गर्नू, र उहाँको मात्र सेवा गर्नू'।” [मत्ती ४:१०]

* येशूलाई धर्मशास्त्र राम्रोसँग थाहा थियो । बालक छँदा पनि येशूलाई परमेश्वरको वचनको गहिरो समझ थियो । [लूका २:४६-४७] यसकारण येशूले सिकाउनुहुँदा र परीक्षाको प्रतिरोध गर्नुहुँदा प्रायः धर्मशास्त्र उद्धृत गर्नुहुन्थ्यो ।

१७. नयाँ नियमले येशूको जीवन र सेवकाईको बारेमा बताउँछ । नयाँ नियममा जम्मा २६० अध्याय र ७९५६ पदहरू छन् । यदि तपाईंले यी संख्याहरूलाई एकअर्कासँग भाग गर्नुभयो भने, तपाईंले येशूले आफ्नो सेवकाई सुरु गर्नुभएको उमेर पाउनुहुनेछ । [७९५६ पदहरू ÷ २६० अध्याय = ३०.६] वास्तवमा, येशूले आफ्नो सेवकाई सुरु गर्दा लगभग ३० वर्षको हुनुहुन्थ्यो ।

१८. येशू र ४० नम्बर

 येशूले मरुभूमिमा ४० दिन उपवास बस्नुभयो; येशूले लगभग ४० महिना प्रचार गर्नुभयो; येशूको पुनरुत्थानको स्वर्गारोहण ४० दिनको फरक थियो ।

१९. येशू, मोशा र एलियाले ४० दिनसम्म उपवास बसे । मोशाले पनि पानी बिना नै बसे ।

२०. परमेश्वर पिताले येशू पृथ्वीमा हुनुहुँदा उहाँसँग ३ पटक श्रव्य रूपमा कुरा गर्नुभयो: उहाँको बप्तिस्मामा; रूपान्तरणमा; येशू क्रूसमा जानुभन्दा पहिले ।

२१. विद्वानहरूका अनुसार, येशूका पहिलो अभिलेख गरिएका शब्दहरू मर्कूस १:१५ मा छन्, “समय पूरा भएको छ, र परमेश्वरको राज्य नजिक आइपुगेको छ। पश्चात्ताप गर, र सुसमाचारमा विश्वास गर ।” 

२२. स्वर्ग जानुअघि येशूका अन्तिम शब्दहरू थिए: “…हेर, म युगको अन्त्यसम्म सधैँ तिमीहरूका साथमा छु ।” [मत्ती २८:२०]

२३. ५००० मानिसहरूलाई खुवाउनु येशूको चमत्कारहरू मध्ये एक थियो । यो चारै सुसमाचारहरूमा रेकर्ड गरिएको एक मात्र चमत्कार हो ।

२४. सुसमाचारका पुस्तकहरूले येशूका कम्तिमा ३७ वटा विस्तृत चमत्कारहरू रेकर्ड गर्दछन् ।

२५. येशूका २४ चमत्कारहरू निको पार्ने चमत्कारहरू थिए, १० प्रकृतिको चमत्कार थिए र ३ पुनरुत्थानका चमत्कारहरू थिए ।

२६. येशू ख्रीष्टले आफ्नो सेवकाईको क्रममा गर्नुभएको पहिलो चमत्कार कानामा भएको विवाह भोजमा पानीलाई दाखरसमा परिणत गर्नु हो ।

२७. यूहन्ना २१:१-१४ मा उल्लेख गरिएको दोस्रो चमत्कारी माछा समात्नु येशूको स्वर्गारोहण हुनुभन्दा पहिले पृथ्वीमा भएको अन्तिम चमत्कार थियो ।

२८. येशूले ३ जनालाई मृत्युबाट ब्यूँताउनुभयो । नैनमा बस्ने विधवाको छोरा, याइरसकी छोरी र लाजरस ।

२९. येशूले आफ्नो पार्थिव सेवकाईमा ४ पटक चमत्कार गर्न “माछा” प्रयोग गर्नुभयो । १. जब उहाँले ५००० मानिसहरूलाई खुवाउनुभयो; २. जब कर तिर्न माछाको मुखमा एउटा सिक्का देखा पर्यो; ३. जब येशूले सिमोन पत्रुसलाई फेरि आफ्नो जाल हान्न भन्नुभयो, तब तिनीहरू माछाले भरिए; ४. जब येशूले माछा मारिरहेका चेलाहरूलाई डुङ्गाको दाहिने छेउमा आफ्नो जाल हान्न भन्नुभयो, र त्यो माछाले भरियो ।

३०. येशूले अरू कुनै पनि आश्चार्यकामहरूभन्दा बढी अन्धाहरूलाई दृष्टि दिनुभयो । अन्धालाई निको पार्नु उहाँको सबैभन्दा धेरै दोहोरिएको चमत्कारहरू मध्ये एक थियो । यशैयाले भविष्यवाणी गरे कि मुक्तिदाताले “तब अन्धाहरूको आँखा खोलिनेछन...” र येशूले त्यो पूरा गर्नुभयो । [यशैया ३५:५]

३१. येशूलाई आफ्नो गृहनगर नासरतमा अस्वीकृत गरियो । [लूका ४:२८-३०] 

३२. आफ्नो जीवनकालमा, येशूलाई एक कट्टरपन्थी मानिन्थ्यो किनभने उहाँले महिलाहरूसँग कुरा गर्नुभयो, पापीहरूसँग समय बिताउनुभयो, र आफ्ना अनुयायीहरूलाई विश्राम दिनमा अन्न टिप्न अनुमति दिनुभयो । 

३३. येशू थकित हुनुभयो, भोकाउनुभयो, र रुनुभयो । उहाँ केवल ईश्वरीय मात्र हुनुहुन्नथ्यो, तर उहाँ पूर्ण मानव पनि हुनुहुन्थ्यो ।

३४. पानीमाथि हिंड्नु भनेको येशूले मात्र गर्न सक्ने चमत्कार थियो । पत्रुसले पनि पानीमाथि हिंड्ने प्रयास गरे तर शंका लागेपछि उनी डुब्न थाले । यो चमत्कार पछि, चेलाहरूले येशूलाई “परमेश्वरको पुत्र” भनेर उपासना गरे । यो उनीहरूको विश्वास र उहाँ वास्तवमा को हुनुहुन्थ्यो भन्ने बुझाइमा एउटा महत्वपूर्ण मोड थियो । [मत्ती १४:३३]

३५. क्रूसमा टाँगिनुअघि गेतसमनीको बगैंचामा प्रार्थना गर्दा येशू यति धेरै व्याकुल हुनुहुन्थ्यो कि उहाँको पसीना रगतका ठूला-ठूला थोप्लाजस्तै जमिनमा खसिरहेका थिए । यसको लागि चिकित्सा शब्द “हेमेटोहाइड्रोसिस” हो । केवल डाक्टर लूकाले मात्र येशूलाई यो भएको उल्लेख गर्छन् । [लूका २२:४४]

३६. येशूले अन्तिम समयमा हिँड्नुभएको बाटोलाई ल्याटिन भाषामा “भिया डोलोरोसा” भनिन्छ, जसको अर्थ हाे, “शोकको बाटो” वा “दुःखको बाटो” । यरूशलेमको यो बाटो आज पनि एक प्रमुख तीर्थयात्रा मार्ग हो । विश्वभरका हजारौं ईसाईहरू हरेक वर्ष यो बाटो हिंड्छन, विशेष गरी इस्टर अघिको हप्तामा ।

३७. येशूको क्रूसमा किला ठोकिएको चिन्ह: “नासरतका येशू, यहूदीहरूका राजा” अरामी, ल्याटिन र ग्रीक भाषामा लेखिएको थियो ।

३८. आज धेरै चर्चहरूमा, जब येशूको क्रूस प्रदर्शन गरिन्छ, क्रूसको माथिको चिन्हमा INRI अक्षरहरू राखिन्छन् । INRI “Iesus Nazarenus Rex Iudaeorum” को संक्षिप्त रूप हो, जुन “Jesus Of Nazaret, The King of The Jesus” को ल्याटिन अनुवाद हो ।

३९. येशू बिहान लगभग ९:०० बजेदेखि दिउँसो ३:०० बजेसम्म, जम्मा छ घण्टा क्रूसमा हुनुहुन्थ्यो ।

४०. परम्परागत रूपमा, धेरैले येशूलाई शुक्रबार दिउँसो क्रूसमा टाँगिएको विश्वास गर्छन् । जसकारण गुड फ्राइडे र इस्टर सन्डेको परम्परा स्थापित छ । धेरैजसो विद्वानहरू अब सहमत छन् कि येशूलाई शुक्रबार होइन, बुधबार दिउँसो क्रूसमा टाँगिएको थियो र गाडिएको थियो ।

४१. येशूलाई क्रूसमा टाँगिएको ठाउँको नाम “गोलगोथा” थियो, जसको अर्थ “खोपडीको ठाउँ” हो । प्रारम्भिक चर्चका पिताहरूका अनुसार, पहाडको आकारले मानिसहरूलाई मानव खप्परको सम्झना दिलाउने भएकाले त्यो ठाउँलाई “खोपडीको ठाउँ” भनिन्थ्यो । गोलगोथा इजरायलको पुरानो शहर यरूशलेमको उत्तरपश्चिमी भागमा अवस्थित चर्च अफ द होली सेपुल्चरको मुनि अवस्थित छ ।

४२. रोमन समयमा क्रूसमा टाँग्नु सामान्य कुरा थियो । यो केवल मार्नको लागि मात्र नभई अन्य सम्भावित अपराधीहरूलाई भयानक चेतावनीको रूपमा पनि डिजाइन गरिएको थियो । क्रूसमा टाँगिएका पीडितहरूलाई अपमानित गरिन्थ्यो, प्रायः पूर्ण रूपमा नाङ्गो झुण्ड्याउन छोडिन्थ्यो । क्रूसमा टाँग्नु मर्ने एउटा “कष्टकर” तरिका पनि थियो किनभने यो मृत्युको धेरै ढिलो र पीडादायी माध्यम थियो । परिस्थितिमा निर्भर गर्दै, केही मानिसहरू क्रूसमा टाँगिएपछि दिनहरूसम्म बाँच्न सक्थे । क्रूसमा टाँगिएको प्रकृति र यसको अपमानजनक रूपलाई ध्यानमा राख्दै, रोमन नागरिकहरूलाई देशद्रोह बाहेक क्रूसमा टाँगिएको थिएन । रोमन वक्ता सिसेरोले उल्लेख गरे कि सबै सजायहरू मध्ये, “क्रूसमा टाँग्नु सबैभन्दा क्रूर र सबैभन्दा भयानक छ ।” 

४३. क्रूसमा टाँगिनुअघि, अपराधीहरूलाई कोर्राले पिटिन्थ्यो । कोर्राको डोरीहरू प्रायः हड्डी, सिसाको गोली वा अन्य धारिलो वस्तुहरूले टाँसिन्थ्यो, कहिलेकाहीं घातक परिणाम हुन्थ्यो । यो सजायले धेरै रक्तस्राव हुन्थ्यो र कहिलेकाहीं मृत्यु पनि हुन्थ्यो ।

४४. क्रूसमा टाँगिएका धेरैजसो पीडितहरू अन्ततः बेहोस भए, तर येशू अन्तसम्म पूर्ण रूपमा सचेत रहनुभयो । प्रार्थनासँगै उहाँ अचानक मर्नुभयो ।

४५. क्रूसमा येशूका ७ अन्तिम शब्दहरू थिए: १. एलोई, एलोई, लामा सबख्थनी?”, जसको अर्थ हो: “मेरो परमेश्वर, मेरो परमेश्वर, तपाईंले मलाई किन त्याग्नुभयो?”; २. पिता, तिनीहरूलाई क्षमा गर्नुहोस्, किनकि तिनीहरू के गर्दैछन् भनेर जान्दैनन्; ३. साँच्चै म तपाईंलाई भन्छु, आज तिमी मसँग स्वर्गमा हुनेछौं; ४. पिता, म मेरो आत्मा तपाईंको हातमा सुम्पन्छु; ५. हे नारी, यहाँ तपाईंको छोरा छ; ६. म तिर्खाएको छु; ७. यो सकियो ।

४६. क्रूसमा झुण्डिएको बेला, येशूले आफ्ना चेलाहरूलाई आफ्नी आमा मरियमको हेरचाह गर्न भन्नुभयो ।

४७. येशूलाई धोका दिएर यहूदाले प्राप्त गरेको ३० सिक्का चाँदी ३० रोमन डेनारी थियो, जुन लगभग एक औसत अमेरिकीले लगभग $४,२०० को भुक्तानी स्वीकार गर्नु बराबर हो ।

४८. ख्रीष्टको मृत्युमा धेरै मृत सन्तहरू आफ्नो चिहानबाट बाहिर निस्के ।

४९. अपराधीहरूको लास गाड्नु सामान्य थिएन । ती लासहरू कुकुर र गिद्धहरूले खानको लागि छोडिन्थ्यो । यद्यपि, येशूका गोप्य चेला, अरिमाथियाका योसेफले पिलातसलाई येशूको लास लैजान अनुरोध गरे; र पिलातसले अनुमति दिए । त्यसैले उनी आए र निकोदेमसको सहयोगमा उहाँको लास लगे र गाडे ।

५०. येशू पृथ्वीमा धेरै गरिब हुनुहुन्थ्यो तर उहाँ जब मर्नुभयो तब उहाँलाई एक धनी मानिसको चिहानमा गाडियो । यशैयाले भविष्यवाणी गरे कि येशूलाई एक धनी मानिसको चिहानमा गाडिनेछ । यो कुरा सयौं वर्ष पछि पूरा भयो ।

५१. येशूका चेलाहरूको ४ वटा सूचीहरू छन् : मत्ती १०:२-४; मर्कूस ३:१६-१९; लूका ६:१४-१६ र प्रेरित १:१३ । चेलाहरूको नाम सूचीबद्ध गरिएको क्रम फरक-फरक हुन्छ । तर सूची सधैं पत्रुसबाट सुरु हुन्छ, र सधैं येशूलाई धोका दिने यहूदा इस्करियोतबाट समाप्त हुन्छ ।

५२. येशूका चेलाहरू किशोरकिशोरी थिए, लगभग सबै १८ वर्ष मुनिका थिए र केही १५ वर्षका पनि थिए । सम्भवतः सबै अविवाहित थिए ।

५३. येशूले ३० वर्षको उमेर भन्दा पहिले नै आफ्नो सेवकाई सुरु गर्नुभयो । ३० वर्षसम्म, उहाँले शान्त, सामान्य जीवन बिताउनुभयो र केवल ३ वर्षमा संसार परिवर्तन गर्नुभयो ।

५४. येशूले आफ्नो सेवकाईको क्रममा ३,००० माइलभन्दा बढी हिँड्नुभयो । यो कुनै साधनको सहयोग बिना न्यूयोर्कदेखि क्यालिफोर्नियासम्म हिँड्नु जस्तै हो ।

५५. इस्लाममा, येशू (वा ईसा) लाई एक महत्त्वपूर्ण अगमवक्ता र मसीह मानिन्छ । इस्लामले यो पनि मान्दछ कि येशू कुमारीबाट जन्मनुभएको थियो, तर उहाँ परमेश्वरको पुत्र हुनुहुन्थ्यो । धेरैजसो मुस्लिमहरूले विश्वास गर्छन् कि परमेश्वरले येशूलाई स्वर्गमा ल्याउनुभयो र उहाँ वास्तवमा क्रूसमा टाँगिनुभएको थिएन ।

Sources :

1. https://www.jesusfilm.org/blog/jesus-facts/

https://www.elijahnotes.com/facts-about-jesus/

2. https://www.factretriever.com/jesus-christ-facts

3. https://www.lcbcchurch.com/articles/10-interesting-facts-about-jesus

4. https://www.chaseoaks.org/articles/10-interesting-facts-jesus-might-surprise

5. https://www.facebook.com/100072588005931/posts/831577829271810/

6. https://topicalbiblestudies.com/16-facts-you-need-to-know-about-jesus/

7. https://watermarkwaves.com/blogs/explore-the-bible/10-interesting-facts-about-jesus-from-the-bible?srsltid=AfmBOoqUKbSrDZvUUaB6HDnFWg4oj0ebsPTMua-2TNMUF-92ccanumzE

8. https://inspirationportal.org/list-of-120-amazing-facts-about-jesus-christ/