जोन वेस्ली - नयाँ जन्म नपाएका मिशनरी

 मिशनरीकाे रूपमा बेलायतबाट अमेरिका गएका जोन वेस्लीले जहाजमा जर्मनीको हर्नहुटबाट आएका २६ जना मोराभियाली ख्रीष्टियनहरूको एउटा समूह भेट्टाए, जो पनि आफ्ना पत्नी र छोराछोरीहरूसँग जर्जिया गइरहेका थिए । तिनीहरूको एक जना बिशप डेविड निचम्यानले यस समूहको नेतृत्व गरेका थिए । जर्जियामा बसाइँ सरेका मोराभिहरूको दोस्रो समूह यिनीहरू नै थिए । जनरल ओग्लेटहोर्पले मोराभिहरूलाई यस बस्तीमा बस्न निम्तो दिएका थिए ।

मोराभिहरू ख्रीष्टियनहरूको अनुपम समूह थिए र तिनीहरू युरोपका महान आत्मिक अगुवा तथा शहीद जोन हसका अनुयायीहरू थिए । मोराभियाली एल्डर ए. जी. स्पेन्नोनबर्गले मोराभिहरूको पहिलो समूहको नेतृत्व गरेका थिए ।

अमेरिकातिरको यात्रामा हुँदा समुद्रमा भयानक आँधी चल्यो र जहाज दुर्घटनाग्रस्त हुने खतरा थियो । तर मोराभिहरू आराधना गर्दै थिए र निकै तीव्रतासाथ परमेश्वरको प्रशंसा गरिरहेका थिए । तर जाेन वेस्ली भने डराईरहेका थिए । 

वेस्ली लेख्छन, “भजनसंग्रह पढेर तिनीहरूको सेवा सुरु हुँदा समुद्र उर्लेर आयो, मुख्य पाललाई टुक्रा-टुक्रा पारेर जहाजलाई छोपेर जहाजको अगाडि भागमा पानी खन्यायो, त्यो ठुलो गहिराइले हामीलाई निलिसकेको जस्तो भइसकेको थियो । अङ्ग्रेजहरूमाझ डरलाग्दो चिच्याहट सुरु भयो । तर जर्मनीहरूले शान्तपूर्वक भजन गाए । मैले तिनीहरूमध्ये एक जनालाई सोधें ‘तपाईं डराउनु भएन ?’ उनले जवाफ दिए, ‘होइन, म परमेश्वरलाई धन्यवाद चढाउँदै छु ।’ मैले सोधें, ‘तर के तपाईंका स्त्री र केटाकेटीहरू डराएनन र ?’ उनले हल्कासँग जवाफ दिए, ‘होइन, हाम्रा स्त्री तथा केटाकेटीहरू मर्न देखि डराउँदैनन ।’ तर मोराभिहरूले परमेश्वरको प्रशंसा गरी नै रहे । अन्ततः आँधी थम्यो ।” जर्जिया पुगेपछि वेस्लीले मोराभियाली बिशप ए. जी. स्पेन्गेनबर्गलाई आत्मिक सल्लाह मागे । बिशपले वेस्लीलाई उनको नयाँ जन्म र मुक्तिको निश्चयबारे छानबिन गरे ।

वेस्लीले आफ्नो सारा हृदयले परमेश्वरको सेवा गरिरहेको भए तापनि सन १७३८ मा आफ्नै जीवनमा ठुलो आत्मिक सङ्कटबाट गुज्रिरहेका थिए । अमेरिकाबाट बेलायत फर्किंदै गर्दा उनले साधारण मोराभियन ख्रीष्टियनहरूले पाएको प्रभुको आनन्द आफूसँग नभएको महसुस गरे । उनले आफ्नो सेवकाईमा कुनै फल नरहेको पनि महसुस गरे । त्यति बेला उनी राेए - “म अमेरिकामा मानिसहरूलाई आत्मिक परिवर्तन गर्न गएँ, तर मलाई कसले आत्मिक परिवर्तन गर्ने ?” अघिल्लो वर्ष जब उनी मोराभियनहरूसँग अमेरिका जाँदै थिए, उनले महसुस गरेका थिए, कि उनीसँग मोराभियन ख्रीष्टियनहरूमा भएको मुक्तिको निश्चयता छैन ।

यस महत्त्वपूर्ण समयमा एक मोराभियन मिसनरी पिटर बोहेलर, जो मिसनरीको रूपमा अमेरिका जाने बाटोमा थिए, छोटो समयको लागि लन्डन आइपुगेका थिए । जोन वेस्लीले उनलाई स्वागत गरे र लन्डनमा उनको बसाइँको व्यवस्था गरे । वेस्लीले उनलाई अक्सर भेट्ने गर्थे, र उनलाई आफ्नो आत्मिक लडन्तबारे खुलस्त बताए । पिटर बोहेलरले उनको कुरा सुनेपछि भने, “श्रीमान वेस्ली, तपाईं उद्धार पाउनुपर्छ, अर्थातः नयाँ गरी जन्मनुपर्छ ।”

वेस्लीले यो आफूलाई लागू हुँदैन भनी उहाँलाई जवाफ दिए, किनभने उनले आफ्नो युवावस्थाबाट परमेश्वरको सेवा गरिरहेका थिए, र उनले आफ्नो जीवन पूर्ण रूपमा परमेश्वरमा समर्पण गरेका थिए, साथै एड्लिकन मण्डलीको पास्टर बनेका थिए, र अब बेलायतमा एक आत्मिक अगुवा थिए ।

तर बोहेलरले फेरि दोहोऱ्याए, कि उनी महान ख्रीष्टियन भए तापनि उनलाई अझै पनि परिवर्तन वा नयाँ गरी जन्मिने अनुभव चाहिन्छ । यसलाई अनुग्रहबाट येशूको प्रायश्चितमाथिको विश्वासद्वारा मात्र पाइने मुक्तिको सिद्धान्त भनिन्छ । 

उनले यो पनि भने, कि परिवर्तनको अनुभव तुरुन्तै पाइन्छ । वेस्लीले यो शिक्षालाई स्वीकार गर्न सकेनन । उनले यो शिक्षालाई स्वीकार गर्न निकै सङ्घर्ष गरे । सङ्घर्ष पछि उनले बोहेलरलाई यो परिवर्तनको अनुभवलाई कसरी प्राप्त गर्न सकिन्छ भनी सोधे । बोहेलरले भने, कि वेस्लीले केवल विश्वासका साथ प्रभु येशूलाई प्रार्थना गर्नुपर्छ र प्रभु येशू ख्रीष्टमा आफ्नो सम्पूर्ण हृदयले विश्वास गर्ने सबैलाई मुक्तिको यो उपहार दिइनेछ । यो सिद्धान्त जोन वेस्ली र चार्ल्स वेस्लीलाई अज्ञात थियो, जो एलिकन मण्डलीमा हुर्किनुभएका थिए, र सधैं आफ्नै प्रयासले विशेष गरी असल कामहरूद्वारा मुक्ति प्राप्त गर्नुमा विश्वास गर्थे । 

[सित्तैमा धर्मी तुल्याउनेबाट हुने उद्धार यो परमेश्वरको एकल कार्य हो, जसलाई पवित्रीकरणले पछ्याउँछ । यो येशूको प्रायश्चितमा विश्वासद्वारा मात्र आधारित छ, र असल कामहरूद्वारा प्रकट हुन्छ ।]

तुरुन्तै जोन वेस्लीले मुक्तिको लागि यो विश्वासको खोजी ख्रीष्टमा मात्र गर्न थाले । चाँडै नै (सन १७३८ मे २४) वेस्ली लन्डनको एल्डर्सगेट स्ट्रीटमा धार्मिक सङ्गतिमा उपस्थित हुँदा उनले आत्मिक रूपमा नयाँ गरी जन्मिनु भन्ने कुरालाई अनुभव गरे । उनले आफ्नो दैनिकीमा यसको वर्णन यसरी गरेका छन, “साँझमा म एल्डर्सगेट-स्ट्रिटको एउटा सङ्गतिमा गएँ, जहाँ एक जनाले रोमीहरूलाई लेखेको पावलको पत्रको लुथरको प्रस्तावना पढेर सुनाउँदै थिए । करिब नौ बज्न पन्ध्र मिनेट बाँकी हुँदा, जब उनले ख्रीष्टमा विश्वासद्वारा हृदयमा काम गर्ने परिवर्तनको वर्णन गर्दै थिए । तब मैले मेरो हृदयमा अनौठो रूपमा न्यानो महसुस गरेँ । मैले मुक्तिको लागि ख्रीष्टमा मात्र भरोसा गरेको महसुस गरे र मलाई एक निश्चय दिइयो, कि उहाँले मेरा पापहरू हटाइदिनुभयो, म जस्तोको पापलाई पनि, र मलाई पाप र मृत्युको व्यवस्थाबाट बचाउनुभयो ।” एकै समयमा चार्ल्स वेस्लीले पनि यो आत्मिक नयाँ जन्म वा परिवर्तनको अनुभव प्राप्त गरे ।

ख्रीष्टमा मात्र विश्वास गरेर पाइने मुक्तिको यो अनुभवले जोन वेस्ली र उहाँका भाइमा ठुलो परिवर्तन ल्यायो । अब उनीहरू दुवैले यो सन्देश बेलायतमा सबैलाई दिन चाहन्थे । तिनीहरू आत्माहरूको लागि अलौकिक प्रेमले जल्न थाले ।

मुक्ति भनेको प्रभु येशू ख्रीष्टमा बालकले जस्तै विश्वास गरेर परमेश्वरकहाँ आउने सबैका लागि परमेश्वरको उपहार हो । कुनै पनि राम्रो काम वा मानवीय प्रयासले यसलाई प्राप्त गर्ने ठाउँ छैन । राम्रो कामको लागि पक्कै पनि परमेश्वरले इनाम दिनुहुन्छ । तर यसले कहिल्यै मुक्ति कमाउन सक्दैन । मुक्ति विशुद्ध रूपमा परमेश्वरको अनुग्रह हो, जो प्रभु येशू ख्रीष्टमा साँचो विश्वासका साथ परमेश्वरकहाँ आउने जो कोहीलाई पनि दिइन्छ ।

आफ्नो आत्मिक परिवर्तनपछि चार्ल्स वेस्लीले प्रभु येशूमा विश्वास गरेर पापबाट मुक्ति पाउने सन्देश सुन्ने सबैलाई प्रचार गर्न थाले । ठुलो जागृति सुरु भयो । उनले प्रचार गरेका सभाहरूमा सहभागी भएका मानिसहरूमध्ये एक महिनामा तीस जना व्यक्तिहरूले विश्वासद्वारा पाइने शान्ति र आनन्द प्राप्त गरेको दाबी गरे । यीमध्ये रोमन क्याथोलिक मण्डलीका सेवक रेभ. हेन्री पियर्स पनि थिए । श्रीमान पियर्सले वेस्लीलाई सोरेहम मण्डलीका सेवक रेभ. विन्सेन्ट पेरोनेटसँग परिचय गराए, जो पछिका समयहरूमा वेस्लीका साथीहरूमध्ये सबैभन्दा मूल्यवान र विश्वासी साथी बने ।

* के तपाईंले नयाँ जन्मकाे अनुभव पाउनुभएकाे छ ?

यसकारण लेखिएको छ,

“तिनीहरू रगतद्वारा, शारीरिक इच्छाद्वारा, र कुनै मान्छेको इच्छाद्वारा होइन तर परमेश्वरबाट जन्मिएका हुन्छन।” [यूहन्ना १:१३]

येशूले तिनलाई जवाफ दिनुभयो, “साँच्चै म तिमीलाई भन्दछु, कोही नयाँ गरी जन्मेन भने उसले परमेश्वरको राज्य देख्न सक्दैन।”

येशूले जवाफ दिनुभयो,  “साँच्चै म तिमीलाई भन्दछु, कोही पानी र आत्माद्वारा जन्मेन भने परमेश्वरको राज्यमा पस्न सक्दैन।  

शरीरबाट जन्मेको शरीर हो, र पवित्र आत्माबाट जन्मेको आत्मा हो।  

मैले तिमीलाई नयाँ गरी जन्मनुपर्छ भन्दा अचम्म नमान।” [यूहन्ना ३:३,५,६,७]

“किनभने अनुग्रहबाट विश्वासद्वारा तिमीहरूले उद्धार पाएका छौ-- र यो तिमीहरू आफैबाट होइन, यो त परमेश्वरको वरदान हो- कर्महरूद्वारा होइन, नत्रता मानिसले घमण्ड गर्नेछ। 

किनकि हामी असल कामहरूका निम्ति ख्रीष्ट येशूमा सृजना गरिएका उहाँका हातका सीप हौं। हामी तीबमोजिम हिँड़ौं भन्ने हेतुले परमेश्वरले पहिलेबाटै ती तयार गर्नुभएको थियो।” [एफिसी २:८-१०]

“परमेश्वर र हाम्रा प्रभु येशू ख्रीष्टका पिता धन्यका हुनुहुन्छ! उहाँको महान् कृपाले मृतकबाट येशू ख्रीष्टको पुनरुत्थानद्वारा एउटा जीवित आशाको निम्ति हामी नयाँ गरी जन्मेका छौं।” [१ पत्रुस १:३]

“किनकि नाश हुने बीउबाट होइन, तर नाश नहुने बीउबाट परमेश्‍वरको जिउँदो र सधैंभरि रहिरहने वचनद्वारा तिमीहरूले नयाँ जन्म पाएका छौ।” [१ पत्रुस १:२३]

“उहाँले आफ्नै इच्छाले सत्यको वचनद्वारा हामीलाई जन्म दिनुभयो, यस हेतुले कि हामी उहाँको सृष्टिको एक अगौटे फलजस्तो बन्न सकौं।” [याकूब १:१८]

“उहाँ धार्मिक हुनुहुन्छ भन्ने कुरा यदि तिमीहरूले जान्यौ भने यो कुरा तिमीहरूलाई निश्चय होस, कि धार्मिकतामा चल्ने हरेक परमेश्वरबाट जन्मेको हुन्छ।” [१ यूहन्ना २:२९]

“परमेश्वरबाट जन्मेको कसैले पनि पाप गरिरहँदैन, किनकि उहाँको स्वभाव त्यसमा रहन्छ, र त्यसले पाप गरिरहन सक्दैन, किनभने त्यो परमेश्वरबाट जन्मेको हो।” [१ यूहन्ना ३:९]

Source :

पुस्तक : “जोन वेस्ली”, प्रकाशक : ट्याबरनेकल अफ गड मिनिस्ट्रीज, पहिलो प्रकाशन : वि.सं. २०८० (सन २०२३), अनुवादक : के.एम.दास, पृ. सं. २५-२६, ३१-३३