एकपटक एक व्यक्तिले एउटा सपना देखे, जसमा तीनजना मानिसहरूले प्रभु येशूको अगाडि घुँडा टेकिरहेका थिए र येशू तिनीहरू प्रत्येकको अगाडि हिँडिरहनुभएको थियाे। त्यस बेला जब येशू तिनीहरू प्रत्येकको छेउबाट हिँड्नुभयो, तब येशूले प्रत्येकलाई फरक व्यवहार गर्नुभयो।
पहिलो मानिसलाई येशूले अंगालो मार्नुभयो।
दोस्रो मानिसलाई येशूले छोनु मात्रै भयो।
तेस्रो मानिसलाई येशूले त्यतिकै छाेडेर जानुभयो।
उनको सपनाको अर्थ के थियो? के प्रभु येशुले पहिलो मानिसलाई अरूभन्दा धेरै प्रेम गर्नुभयो? के अन्तिम मानिसमा उहाँको प्रेम कम छ?
जब ती सपना देख्ने व्यक्तिले प्रभुलाई त्यसको अर्थ सोधे, तब प्रभु येशूले भन्नुभयो, “पहिलो मानिस निकै कमजोर थियो, यसैले उसलाई अंगालो मारे। दोस्रो मानिस निरुत्साहित थियो, यसैले उसलाई उत्साहकाे निम्ति छाेए। तेस्रो मानिस आत्मिक रूपमा बलियो थियो, यसैले उसलाई उसको अवस्थामा छाेडेर हिँडे।”
निस्सन्देह, यसको मतलब यो होइन कि जब हामी आत्मिक रूपमा बलियो हुन्छौँ, तब प्रभुले हामीलाई त्याग्नुहुन्छ। तर यसको अर्थ के हो भने प्रभुले त्यस समयमा आवश्यक पर्नेहरूलाई आफ्नो अनुग्रह धेरै दिनुहुन्छ। वास्तवमा येशूले तिनीहरूलाई तिनीहरूको शक्ति र अवस्था अनुसार व्यवहार गर्नुभयो।
सायद तपाई प्रभुबाट टाढा भएको महसुस गर्नुहुन्छ किनभने तपाईले उहाँलाई पहिले जस्तो महसुस गर्नुहुन्न। यसको मतलब उहाँ हामीबाट टाढा हुनुहुन्छ भन्ने होइन। तर याद गर्नुहोस, तपाईं जुन परिस्थितिमा भए पनि प्रभुले तपाईंलाई कहिल्यै त्याग्नुहुने छैन भनी जान्नुहोस। हाम्रो विश्वास हाम्रो भावनाहरूमा भर पर्नु हुँदैन।
* तपाईं विश्वासमा जति बलियो बन्नुहुन्छ, त्यति नै भावनाहरूमा कम भरोसा गर्नुहुनेछ।
यसकारण लेखिएको छ,
“मैले तिमीहरूलाई आज्ञा गरेका सबै कुरा पालन गर्न तिनीहरूलाई सिकाओ। हेर, म युगको अन्त्यसम्म सधैँ तिमीहरूका साथमा छु।” [मत्ती २८:२०]
“म अन्धाहरूलाई तिनीहरूले नचिनेको बाटोमा डोर्याउनेछु। तिनीहरूले नजानेको बाटोमा म तिनीहरूलाई बाटो देखाउँदै लानेछु। म तिनीहरूका अगि अँध्यारोलाई उज्यालो र खाल्टाखुल्टी ठाउँलाई सम्म बनाउनेछु। यी कामहरू म गर्नेछु। म तिनीहरूलाई त्याग्नेछैनँ।” [यशैया ४२:१६]
No comments:
Post a Comment