ठीक व्यक्तिसँग विवाह गर्नु कति महत्त्वपूर्ण छ?

 

वैवाहिक जीवनले तपाईंलाई स्वर्गको निम्ति तालिम दिन्छ र प्रभुसँग तपाईंको एकता र संगतिलाई धेरै हदसम्म निर्धारित गर्नेछ। परमेश्वर मसँग धेरै नै दयालु हुनुभयो। उहाँले समान दर्शन भएको कसैसँग मलाई एक गराउनुभयो। मेरी पत्नी धेरै दयालु र उदार थिइन। उनको केवल एउटै उत्कट अभिलाषा थियो, मेरो जीवनको निम्ति परमेश्वरको बोलावट पूरा गर्न मेरो सहायता गर्नु। उनी मलाई उत्साह दिन सधैँ मेरो जीवनमा थिइन। मैले प्रचार गरेको सुनेर उनले गर्ने टिप्पणी नै मेरो लागि सर्वाधिक महत्त्वपूर्ण हुन्थ्यो। तिनी यस किसिमका कुराहरू भन्ने गर्थिन, “ठीकै छ, तिमीले बुझेकै छौ, सुरुवात राम्रो थियो, बीचको भाग ठीकै थियो। तर मलाई लाग्छ निष्कर्षचाहिँ तिमीले अझै मेहनत गर्नुपर्दछ र अझ राम्रो गर्नुपर्दछ।” मेरो निम्ति यो नै सबैभन्दा महत्त्वपूर्ण हुन्थ्यो। अरूहरू भन्ने गर्थे, “त्यो त अति राम्रो उपदेश थियो”, वा यस्तै खालका कुराहरू भन्थे तर मेरो लागि यस्ता भनाइको महत्त्व थिएन, किनकि तिनले त्यस्तो भनेकी थिइनन। मूल कुरो के हो भने मेरी पत्नीले जीवनमा मलाई सहायता गरिन। म जाँचहरू हुँदो जाँदा तिनी मसँगसँगै हुन्थिन। हामी एकसाथ निकै बलियो बन्धनमा बाँधिएका थियौँ। उनी एक अद्भुत व्यक्ति थिइन र उनले स्वर्गमा एउटा आश्चर्यजनक घर र धेरै इनामहरू प्राप्त गरिन।

व्यक्तिगत तवरमा विवाह गर्ने धेरै मौकाहरू मैले पाएको थिएँ। तर ती केटीले मैले पाएकै बोलावट पाएकी थिइनन भनी हरेकपल्ट प्रभुले मलाई कडा चेतावनी दिनुभयो। मैले कुनै पनि एउटी केटीसँग विवाह गरेको भए तिनले मेरो आत्मिक जीवनलाई सीमित तुल्याउने थिइन, अनि म मेरो जीवनको निम्ति परमेश्वरको उद्देश्य पूरा गर्ने थिइनँ। तर परमेश्वरले कृपागरी समान दर्शन भएकी केटीको निम्ति मलाई जोगाएर राख्नुभयो। यसैकारण, म जवान मानिसहरूलाई निरन्तर चेतावनी दिइरहन्छु, परमेश्वरको चयनसँग विवाह गर्न प्रतीक्षा गर्दा जीवन सार्थक हुनेछ। म यहाँ प्रष्टै भन्न चाहन्छु, भिन्न स्वभाव र मिजासकी अर्कै केटीसँग मैले विवाह गरेको भए म यति सफल हुनसक्ने थिइनँ। उहाँले छान्नुभएको व्यक्तिसँग विवाह गर्नुभएपछि तपाईंको जीवनमा धेरै सामञ्जस्य, मेलमिलाप, एकता, पारस्परिक प्रेम र एक अर्काप्रति आदरभाव हुन्छ। यो कुरो उहाँसँग र त्यसपछि एक अर्कासँग प्रवाहित हुँदै प्रभुलाई अग्रस्थानमा राखी पति र पत्नीको समर्पणबाट आउँछ। मेरी पत्नीले मलाई सदैव आदर गरिन। तर मलाई लाग्छ, उनले मलाई गरेकीभन्दा मेरो हृदयमा उनको निम्ति धेरै आदर थियो। उनी सधैँ मभन्दा बढी आत्मिक भएको अनुभव गरेँ, र मसँग नभएका गुण र विशेषताहरू उनमा थिए। उनको मृत्युको दिन नजिकै आउँदा मेरी पत्नीले मेरी सेक्रेटरीसँग भनिन, विवाहका हाम्रा पैतीस वर्षहरूमा हाम्रा बीचमा कहिल्यै वादविवाद भएन। यो उनकै कारण सम्भव भएको थियो, मेरो कारण होइन। म बल्लतल्ल सफल (पास) भएँ। तर मेरी पत्नीले पाएको ग्रेड (अंक) मैले पाएकोभन्दा धेरै उच्च थियो भन्ने मैले सोचें। याे गवाही डा. ब्रायन जे. बेलीकाे हाे।

[नाेट : डा. ब्रायन जे. बेली (1925-2012) सियोन फेलोशिप इन्टरनेशनल, सियोन मिनिस्ट्रियल इन्स्टिच्युट, सियोन विश्वविद्यालयका अध्यक्ष र सियोन चैपलका वरिष्ठ पास्टर थिए। आफ्नो सेवकाईमा, उनले 65 पुस्तकहरू लेखे (जसलाई 34 भाषाहरूमा अनुवाद गरिएको छ), र 100 भन्दा बढी देशहरूमा व्यापक रूपमा यात्रा, शिक्षण र प्रचार गरे। 87 वर्षको उमेरमा, उनले 11 जुन, 2012 मा प्रभुले उहाँलाई घर नल्याउञ्जेल (उनको अन्तिम बिरामीको समयमा शरिरकाे बलले साथ नदिँदा पनि) सिकाउँदै, प्रचार गर्दै र सल्लाह दिइरहेका थिए। उनका पुस्तकहरूले संसारभर ख्रीष्टको शरीरलाई आशिष दिएको छ र ठूलो आत्मिक वृद्धिको नेतृत्व गरेको छ। उनले विश्वासीहरुलाई परमेश्वरको व्यवस्था सिकाउँदै आत्मिक सियोन पर्वतमा तिनीहरुलाई पवित्रताको बाटो स्थापित गराएका छन।]

Sources :

1. पुस्तक : “स्वर्गका वैभवहरू र नरकका अवर्णनीय आतङ्कहरू”, डा. ब्रायन जे. बेली, पृष्ठ 84-85, Translated and published in Nepali language by Good News Publisher, 2009

2. https://www.zionfellowship.org/about/our-founder/