वाचम्यान नी काे प्रार्थना र परमेश्वरकाे प्रबन्ध

 सन १९२२ को अन्त्यतिर, फूचाओमा केही व्यक्तिहरू प्रभुमा आइसकेका थिए, र प्रभुमा आउने क्रम बढ्दो थियो । त्यसैले एउटा पत्रिका छाप्ने मेरो हृदयमा ठूलो बोझ उत्पन्न भयो । त्यो समयमा हामीलाई धेरै कठिनाइ थियो । एक हप्ता प्रार्थना गर्याैं, दुई हप्ता प्रार्थना गर्याैं, अनि एक महिनाभन्दा बढि प्रार्थना गर्याैं, तरैपनि हामीसँग कत्ति पनि पैसा थिएन । 

एक बिहान म सबेरै उठें र भनें, “अब अरु प्रार्थना गर्न जरुरी छैन । यो विश्वासको अभाव हो । अब हामीले के गर्नुपर्छ भने हामीले लेख्न शुरु गर्नुपर्छ । के प्रभुले पहिला हाम्रो हातमा पैसा थमाइदिनुभएपछि हामीले लेख्न शुरु गर्ने हो र ? आजबाट म पैसाको लागि प्रार्थना गर्दिनँ, म अब अघि बढ्छु, लेख्न थाल्छु ।”

जब अन्तिम शब्द पनि लेखिसकियो, सबै कुरा तयार भयो, मैले भनें, “पैसा आउँछ !” अन्त्यमा प्रार्थना गर्न फेरि मैले घुँडा टेकें र परमेश्वरलाई भनें “हे परमेश्वर ! छपाइको लागि सबै लेख तयार भयो, तर अझैसम्म पनि हाम्रो हातमा पैसा छैन ।” प्रार्थना गरिसकेपछि परमेश्वरले अवश्य नै रकमको प्रबन्ध गरिदिनुहुनेथ्यो भन्ने कुराको निश्चयता मेरो मनमा भयो, त्यसैले हामीले परमेश्वरलाई धन्यवाद दिएर उहाँको प्रशंसा गर्याैं । आश्चर्यजनक घटना भयो ! 

प्रार्थना सकेर जसै हामी उठ्यौं, कसैले ढोका ढकढक्याएको आवाज आयो । मैले सोचें कि अवश्य नै कसैले केही रकम हामीकहाँ लिएर आएको हुनुपर्छ । ढोका खोलेर हेर्दा त एकजना अति नै धनाढ्य दिदी पो आएकी रहिछन, तर तिनी थिइन अति कन्जुस, तिनलाई देखेर म चकित भएँ । मैले मन-मनमा सोचें, “यस्ती कन्जुस दिदीले के पैसा लिएर आएकी हुन्थिन होला र !” 

तर मैले सोंचे विपरीत तिनले भनिन, “म एकदमै महत्वपूर्ण विषय लिएर तपाईंलाई भेट्न आएकी हुँ ।” 

मैले भनें, “कृपया के विषय थियो, भन्नुहोस ।” 

तिनले मलाई सोधिन, “ख्रीष्टियानहरूले कसरी दिनुपर्छ ?” 

मैले तिनलाई भनें, “हामीले परमेश्वरलाई दिनको लागि पुरानो करारको दशांश दिने प्रथालाई नै पछयाउनुपर्छ भन्ने छैन, तर २ कोरिन्थी ९:७ मा परमेश्वरले भन्नुभएको कुरालाई हामीले पछ्याउनुपर्छ, हरेक व्यक्तिले परमेश्वरले भन्नुभएअनुसार दिनुपर्छ, उसले आधा भाग वा एक तिहाई वा दशौं भाग वा बिसौं भाग, जति पनि दिन सक्छ ।”

“यो गिफ्ट कसलाई दिनुपर्छ ?” भनेर तिनले सोधिन । 

मैले भनें, “तपाईंले यस्ता मण्डलीहरूलाई नदिनुहोस, जसले परमेश्वरको विरोध गर्छन, अनि यस्ताहरूलाई पनि नदिनुहोस, जसले परमेश्वरको वचन बाइबललाई विश्वास गर्दैनन र जसले परमेश्वरले बहाउनुभएको रगतद्वारा प्राप्त हुने छुटकारालाई विश्वास गर्दैनन । यदि तिनीहरूलाई कसैले पनि सहयोग दिएनन भने तिनीहरूले तिनीहरूका झूठा कुराहरूलाई प्रचार गरिरहन सक्दैनन । कुनै गरिब दुःखीहरूलाई दिनुभन्दाअघि वा कुनै विशेष परमेश्वरको महिमा हुने कामको निम्ति दिनुअघि परमेश्वरलाई प्रार्थना गर्नुहोस, तर कुनै अयोग्य संगठनहरूलाई नदिनुहोस ।”

तिनले भनिन, “परमेश्वरले मलाई केही दिनदेखि भनिरहनुभएको छ, 'तिमी पैसाको अति नै भक्त छौ' पहिला त मैले यस कुरालाई वास्तै गरिनँ, तर अब म गर्न सक्छु । आज बिहान मैले प्रार्थना गरिरहँदा परमेश्वरले मलाई भन्नुभयो, 'तिमीले अब प्रार्थना गरिरहनुपर्दैन । पहिला तिमीले पैसा दिनुपर्छ' । मलाई अप्ठ्यारो लागिरहेको छ, तर यहाँ मेरो साथमा ३० डलर छ, यसलाई लिनुहोस र परमेश्वरको काममा खर्च गर्नुहोस ।” 

यो रकम १४०० प्रति “वर्तमान साक्षी” पत्रिका छाप्नको लागि पर्याप्त थियो । पछिबाट कसैले हामीलाई फेरि ३० डलर दियो, यो रकम सो पत्रिकालाई अन्यत्र पठाउँदा लाग्ने हुलाक महसुल तिर्न र अन्य आकस्मिक खर्च व्यहोर्नको लागि पर्याप्त थियो । यसरी “वर्तमान साक्षी” (The Present Testimony) नामक पत्रिकाको पहिलो अंक छापियो ।

* जब प्रार्थना तपाईंको बानी बन्छ, चमत्कार तपाईंको जीवनशैली बन्छ ।

तपाईंको बाटोमा जेसुकै आए पनि प्रार्थना गर्न कहिल्यै नछोड्नुहोस ।

[वाचम्यान नी (नोभेम्बर ४, १९०३ - मे ३०, १९७२) एक चिनियाँ मण्डलीकाे अगुवा र ख्रीष्टियन शिक्षक थिए, जसले २० औं शताब्दीमा चीनमा सेवा गरे । १९२२ मा, उनले फुजियान प्रान्तको फुचाओमा मण्डलीहरू सुरु गरे, जुन स्थानीय मण्डलीहरूको सुरुवात मानिन्छ । आफ्नो ३० वर्षको सेवकाईको अवधिमा, नीले बाइबलको व्याख्या गर्ने धेरै पुस्तकहरू प्रकाशित गरे । उनले चीनभरि मण्डलीहरू स्थापना गरे र बाइबल विद्यार्थीहरू र मण्डलीका सेवकहरूलाई तालिम दिन धेरै सम्मेलनहरू आयोजना गरे । कम्युनिस्ट क्रान्ति पछि, नीलाई आफ्नो विश्वासको लागि सताइयो र थुप्रै झुठो आरोप लगाएर जेलमा हालियो र आफ्नो जीवनको अन्तिम २० वर्ष जेलमा बिताए । उनलाई चिनियाँ मण्डलीको शहीद र चिनियाँ आदिवासी मण्डलीको सबैभन्दा महत्त्वपूर्ण अगुवाहरू मध्ये एक मानिन्छ ।]

Sources :

1. पुस्तक : “वाचम्यान नी काे गवाही”, के. एच. वेईद्वारा संकलित, प्रकाशक : कनान प्रेयर हाउस, प्रथम संस्करण : डिसेम्बर,२०१७, पृष्ठ २२-२४

2. https://en.m.wikipedia.org/wiki/Watchman_Nee

3. https://www.gotquestions.org/Watchman-Nee.html

4. https://www.bdcconline.net/en/stories/nee-watchman

5. https://www.watchmannee.org/life-ministry.html

6. https://thirdmill.org/magazine/article.asp/link/hue_mountfort%5ECH.Mountfort.watchman.nee.bio.html/at/Watchman%20Nee%20(1903-1972):%20A%20Biographical%20Study